Posts Tagged ‘Кокос’


Ова е веројатно прв и едниствен пат на блогов да се зборува за алкохол! Нова година, Божиќ, празници и славења еден куп, па кај мене дома се одлучивме да испробаме баш класична празнична трпеза со руска салата (овојпат со мајонез од компири), торта и малку алкохол.

Коко-ликер

Со алкохолот сум сосема скаран и од сите видови сакам да пробам само вино, ако е доволно благо и задолжително да е домашно. Добро, ни некој убав ликер не е на одмет, ама само во многу мала доза. (more…)

Read Full Post »


Летото асоцира на сокови, на сладолед, на мнооогу овошје, на лубеници, само треба да се направи вистинскиот избор и летото ќе значи уживање, а не покачување на телесната тежина. Летото исто така значи и сушење овошје и зеленук и ферментација. За овој рецепт најбитни ни се правењето сок и сушењето.

Туфахија бомбици

Зошто да се купува „100% природен сок“ од продавница, кога можете дома да си исцедите вистински природен сок. Сега се актуелни зелените јаболка, така што можете да ги исцедите, да ги разредите со 2 чаши вода, да додадете сок од еден лимон и малку мед, и имате прекрасен освежителен сок. Откако ќе го направите сокот, пулпата никако не смеете да ја фрлате. (more…)

Read Full Post »


Јатки и семкиВо рецептите честопати употребувам продукти кои или се скапи ако се купат во продавница, ретко се наоѓаат или воопшто ги нема. За таа цел, се обидувам ваквите продукти да си ги направам сам дома. На тој начин заштедувам пари и што е многу битно, точно знам што ставам во нивниот состав – без емулгатори, засилувачи на вкус или некои други хемиски додатоци. Постот редовно ќе го обновувам со по некоја нова „тајна“ за ве убедам да не се откажете на патот кон здравото готвење. (more…)

Read Full Post »


Доооолго време се обидував да најдам рецепт, финта или што било за да добијам крцкави колачиња. Крцкавиот момент во колачите го прават маслото, путерот и сл., кои јас ги одбегнувам, посебно во загреана варијанта.

Посни крцкави колачиња

Најблиску до решението бев кога најдов рецепти за дехидрирани крекери, но дехидрирањето со отворена рерна по цели 6, 10 или 12 часови е нешто што не можам да си го дозволам и поради сметката за струја и поради нервите. Толку долго чекање не е за мене. (more…)

Read Full Post »


Еве ви колач што се прави за посебна прилика, не затоа што е премногу скап или бара многу работа, туку едноставно затоа што е премногу вкусен и со него може да се одбележи значаен момент. Значи, ова го правите за Нова Година или за Божиќ или и за двата празника истовремено.

Брзински колач со јаболка и афион

Идејата за колачот доаѓа од еден сличен макробиотски што го најдов на сајтот на 8-ка и до пред една година го правев во оригиналната варијанта. Колачот, како што е смислен и објавен на сајтот, е одличен за транзиционен период за оние кои се привикнуваат на поздрава исхрана, но сѐ уште со навиките влечат кон конвенционалниот терк. Останатите ќе му најдат многу недостатоци и ќе се обидат да си направат своја верзија, како мене.

Пред некој ден, по огромна пауза, повторно го проанализирав рецептот за макробиотскиот колач. Од денешен аспект, сфатив дека се коси со некои мои сфаќања за здравата храна.

Прво: рецептот предвидува загревање јатки. Тоа кај мене е едно големо НЕ, затоа што загреаните јатки се исто што и пржени компири – ОТРОВ!

Второ: рецептот предвидува термичка обработка на јаболка. Јаболката термички обработени се оштетуваат и потоа го скиселуваат организмот.

Трето: во овој период јадев малку повеќе тестенини отколку што го правам тоа вообичаено, па сакав да одбегнам рецепт што содржи брашно.

Поттикнат од овие ставови, почнав со мојата нова интерпретација на рецептот за макробиотскиот колач, нешто додадов, нешто изменив и на крај излезе прекрасна слатка на која не и треба ни печење, ни пазење да не загори. Повеќе внимание бара само чоколадниот прелив, кој не е задолжителен. Значи, блендерот в рака, продуктите пред вас и 15-минутната авантура може да почне!

Брзински колач со јаболка и афион

Брзински колач со јаболка и афион

Состојки за „тестото“:

1 чаша ореви

1 чаша бадеми

1 чаша семе од афион

1 чаша кокосово брашно

1 чаша сечкани суви кајсии (откиснати ½ час во топла вода)

7-8 урми

1 голема лажица мед

5 помали јаболка (4 средни)

½ мала лажица цимет

1 мала лажица ванила

Состојки за чоколадниот крем:

1 чаша вода

1 чаша кафеав, природен шеќер

1 чаша какао

1 мала лажица ванила

Прстофат сол

Рендана кора од портокал (за декорација)

Сечкани суви кајсии (за декорација)

Опис:

1. Во бледнер со Ѕ сечило се мелат оревите и бадемите.

2. Со мелење се продолжува откако ќе се доадат афионот, кокосовото брашно, сечакните суви кајсии.

3. Откако претходните состојки убаво ќе се измешаат и иситнат, додадете ги медот и урмите и од овој момент можете да почнете да мелете со рачен или друг посилен блендер за да се добие похомогена смеса.

Рецептот може да запре и овде, затоа што и ваквата мешавина е убава, но за мој вкус многу тешка за конзумирање. Затоа продолжуваме со јаболка за да дадат свежина на колачот.

4. Блендирањето продолжете го со тоа што на „тестото“ со јатки и суво овошје постепено ќе му додавате парчиња јаболка. Вода не е потребна при блендирањето затоа што јаболката ќе пуштат и ќе му ја олеснат работата на блендерот.

5. Додадете ги зачините.

6. Смесата оформете ја во калап, па ставете ја да отстои во фрижидер. Откако убаво ќе се излади, внимателно рассечете ја на коцки.

Колачот и вака е готов и вкусен, ама малку чоколадо никогаш не е на одмет.

Брзински колач со јаболка и афион

Ова е процедурата за чокладниот прелив:

1. Почнете со загревање на водата во која ќе го ставите шеќерот и ќе вметнете половина чаша какао и простофат сол.

2. Постојано мешајте и кога какаото што се вари ќе дојде до точка на вриење, шпоретот намалете го на најниска температура и варете 15-ина минути со постојано мешање со лажица додека водата не се преполови. Внимавајте да не ви претече или да не ви загори.

3. Пред крај на варењето постепено додавајте ја и втората половина од какаото и мешајте со лажица за смесата да почне да се згуснува. Внимавајте, во овој дел какаото може да ви загори. Ако ви останат грутки, свареното какао можете да го изедначите со рачен блендер или со миксер.

4. Оставете го чоколадниот прелив да се излади.

5. Од чоколадниот прелив попрскувате  на секоја коцка од колачот со јаболка и афион. Не ставајте премногу за да не доминира вкусот на чоколадото.

6. За декорација, коцките попрскајте ги со рендана кора од постокал. На тој начин ќе добиете вкус и мирис на Ресана.

7. Ако и ова не ви е доволно за декорација, посипете малку исечкани суви кајсии.

Текстот е премногу долг и се чини дека и рецептот е тежок, ама впечатокот е погрешен. Всушност и е е битно колку време ќе изгубите, затоа што подоцна кога ќе го пробате, ќе сфатите дека ова е еден од најосвежителните колачи што некогаш сте ги вкусиле.

Read Full Post »


Торта од моркови со прелив од индиски оревиКако деца да натерате да јадат свеж зеленчук. Моите деца не сакаат ни да го помирисаат. Не знам каде ми е грешката, но ако не успеам да им го протнам во варива, нема ни да го пробаат. Овошје може, слатки работи, секако, зеленчук и салати никако! Па, знаете како се вели, кога не можеш против некого, придружи му се. Или во мој превод, подметни им го зеленчукот во она што најмногу го сакаат – во торта. (more…)

Read Full Post »


Прва дилема кога го сменив начинот на исхрана ми беа благите работи. Колку често и да читам дека рафинираниот шеќер е штетен, рафинираниот шеќер е исто што и дрога, рафинираниот шеќер е ваков или таков, јас сум зависник. Кревам рака и признавам. Но кога почна мојава приказна со здравата исхрана гледав слатките искушенија да ги избегнувам, без да им најдам соодветна алтернатива. Едноставно, немав благо за „кризни“ моменти, затоа што не знаев како да го направам, а притоа да не се чувствуам виновен додека го јадам, да не ми проработи грижата на совест. Без благо бев како наркоман без наркотици. На крај ваквата состојба на неколку пати кулминира со прејадување од се чоколадно што го најдов пред себе и со страшна тежина во желудникот уште по една недела подоцна. (more…)

Read Full Post »

%d bloggers like this: